Farewell Speech in Odia for Teacher : It’s been a pleasure serving as your teacher over the last few months. I am grateful to have been given this opportunity and I hope that I have been able to pass on some of my knowledge to you. It has been a great pleasure helping you learn new things and make new friends.

ବକୃତା

ସହକାରୀ ଶିକ୍ଷକଙ୍କୁ ବିଦାୟ ସମ୍ବର୍ଦ୍ଧନା

ସମ୍ମାନନୀୟ ସଭାପତି ମହୋଦୟ, ମଞ୍ଚାସୀନ ସମ୍ମାନୀତ ଅତିଥିଗଣ , ପ୍ରିୟ ଶିକ୍ଷକ ଶିକ୍ଷୟିତ୍ରୀ ବୃନ୍ଦ, ବିଦ୍ୟାଳୟ ପ୍ରାଙ୍ଗଣରେ ସଦା ପ୍ରଷ୍ଫୁଟିତ ତେଜସ୍ଵୀ ତାରକା ସଦୃଶ ମୋର ଛୋଟବଡ଼ ଭାଇ ଓ ଭଉଣୀମାନେ , ତଥା ଆଜିର ସଭାର ଯିଏ ଚର୍ଚ୍ଚାମୁଖ୍ୟ , ଆମ ସମସ୍ତଙ୍କର ପ୍ରିୟତମ ଶିକ୍ଷକ——————–
ଆଜି ସମସ୍ତଙ୍କ ମନରେ ଅଶେଷ ଦୁଃଖ, ଆଖିରେ ଲୁହ ଓ ମନରେ କୋହ ଭରି ଉଠିଛି l କାରଣ ଆଜି ଆମର ଅତିପ୍ରିୟ ଶିକ୍ଷକ———— ଙ୍କ ବିଦାୟ ସମ୍ବର୍ଦ୍ଧନା ଉତ୍ସବ ପାଳନ କରାଯାଇଛି l ଆମର ପ୍ରିୟ ଶିକ୍ଷକ ଆଧୁନିକ ଭାଷାରେ ଶିକ୍ଷକ ନ ଥିଲେ l ସେ ଗୁରୁ ପଦବାଚ୍ୟ ଥିଲେ l କେବଳ ଶ୍ରେଣୀଗୃହରେ ଶିକ୍ଷାଦାନ କରୁ ନ ଥିଲେ; ପଇସା ପାଇଁ ପାଠ ପଢ଼ାଇବା ଲାଳସା ସାରଙ୍କର ନ ଥିଲା l ବହୁ ଦୁଃଖରେ କାଳାତିପାତ କରୁଥିଲେ ସୁଦ୍ଧା ସବୁବେଳେ ହସ ହସ ମୁହଁ, ଉଚ୍ଚକୋଟୀର ଚରିତ୍ରବତ୍ତା , ମଧୁର ନମ୍ର ବ୍ୟବହାର, ଛାତ୍ରବତ୍ସଳ , ବିଦ୍ୟାଳୟ ପ୍ରତି ଅମାପ ସ୍ନେହ ଶ୍ରଦ୍ଧା, ସମୟାନୁବର୍ତ୍ତିତା ଆମ ପାଇଁ ସବୁଦିନ ସ୍ମରଣୀୟ ତଥା ଗ୍ରହଣୀୟ l
ଶିକ୍ଷା ଗୋଟିଏ ବ୍ୟବସାୟ ନୁହେଁ l ଶିକ୍ଷାନୁଷ୍ଠାନ ଲକ୍ଷ୍ମୀଙ୍କ ବାସସ୍ଥଳୀ ନୁହେଁ ସରସ୍ୱତୀଙ୍କ ବାସସ୍ଥଳୀ l ଶିକ୍ଷକ ଆମପାଇଁ ଆଦର୍ଶ ପାଠ୍ୟପୁସ୍ତକ କିଣିଦେବା, ମାଗଣାରେ ଶିକ୍ଷାଦାନ ( କୋଚିଂ) କରୁଥିଲେ l
ଏତଦ୍ ବ୍ୟତୀତ ସେ ଅନେକ ପୁସ୍ତକ ମଧ୍ୟ ରଚନା କରିଛନ୍ତି l ଶିକ୍ଷାଦାନ ସହିତ ସେ ଅନ୍ୟାନ୍ୟ ଗୁଣର ମଧ୍ୟ ଅଧିକାରୀ ଥିଲେl ଶିକ୍ଷାଦାନ ସହିତ ବଗିଚା କାମ, କ୍ରୀଡ଼ା କସରତ , ସ୍କାଉଟ, ରେଡ଼କ୍ରସ, ମାଗାଜିନ୍ ପାଇଁ ଲେଖିବାରେ ଧୁରନ୍ଧର ଥିଲେ l କେବଳ ସେତିକି ନୁହେଁ ନାଟକ ରଚନା କରିବା, ନାଟକରେ ନିର୍ଦ୍ଦେଶନା ଦେବା, ନାଟକ ପରିଚାଳନା କରିବାରେ ପାରଙ୍ଗମ ଥିଲେ l ଏକ ପଦରେ କହିଲେ ଆମ ସାର୍ ଜଣେ ବହୁମୁଖୀ ପ୍ରତିଭା ସଂପନ୍ନ ସୁଦକ୍ଷ ଶିକ୍ଷକ ଥିଲେ l ସେ ଥିଲେ କର୍ମଯୋଗୀ, ତ୍ୟାଗୀ, ସମାଜସେବୀ l
ପୂଜ୍ୟ, ଚିରନମସ୍ୟ ଆମ ଏହି ଗୁରୁଜୀଙ୍କର କଥାକୁ ଅନୁସରଣ କରିଚାଲିଲେ ଆମେ ବାସ୍ତବିକ ଜଣେ ଜଣେ ଉଚ୍ଚକ୍ଷାତି ସଂପନ୍ନ ମଣିଷ ହୋଇପାରିବା l ବିଦ୍ୟାଳୟର ସର୍ବାଙ୍ଗୀନ ଉନ୍ନତି ପାଇଁ ସେ ସର୍ବଦା ଚେଷ୍ଟିତ ଥିଲେ l ଶ୍ରେଣୀଗୃହରେ ପାଠ ପଢ଼ାଇଲାବେଳେ ସେ ଏପରି ଭାବପ୍ରବଣ ହୋଇଯାଉଥିଲେ ଯେ ଜଣେ ନିମ୍ନମାନର ଛାତ୍ର ମଧ୍ୟ ଭଲ ପଢିପାରୁଥିଲା l ସେ ଆମପାଇଁ କେବଳ ଜଣେ ଶିକ୍ଷକ ନ ଥିଲେ ସେ ଥିଲେ ଆମର ଅଭିଭାବକ, ବାପା- ମାଆ- ଭାଇ- ବନ୍ଧୁ ଓ କୁଟୁମ୍ବ l ଯେତେବେଳେ କୌଣସି ଛାତ୍ର ଶ୍ରେଣୀକୁ ଆସୁ ନଥିଲା ପୂଜ୍ୟ ଗୁରୁଜୀ ତାଙ୍କ ଘରକୁ ଯାଉଥିଲେ, ବୁଝାଇ ସୁଝାଇ, କୋଳେଇ କାଖେଇ, ଆଖି ଦେଖାଇ ତାକୁ କ୍ଲାସକୁ ଆଣୁଥିଲେ l ରୋଗ ଶେଯରେ ପଡ଼ିଥିବା ଛାତ୍ର ପାଖରେ ବସି ସେବା ଶୁଶ୍ରୁଷା କରୁଥିଲେ l ଆମ ବିଦ୍ୟାଳୟର ଗଣେଶ ପୂଜା, ସରସ୍ୱତୀ ପୂଜା ପୁରସ୍କାର ବିତରଣ ଉତ୍ସବରେ ସାରଙ୍କ କାର୍ଯ୍ୟ ଅବିସ୍ମରଣୀୟ l ଫୁଲ କାଟିବା ଠାରୁ ଆରମ୍ଭ କରି ଭୋଜି ଭାତରେ ପରିବେଷଣ କରିବା ତାଙ୍କର ଅନନ୍ୟ ଗୁଣଥିଲା l
ବିଦ୍ୟାଳୟର ସମସ୍ତ କାର୍ଯ୍ୟରେ ଆଗଭର ହେଉଥିଲେ l ଆମର ଏହି ପୂଜ୍ୟ ଶିକ୍ଷକ ଶିକ୍ଷାଦାନ ବ୍ୟତୀତ ବାହାରର ଅନେକ ଅନୁଷ୍ଠାନ ସହିତ ଜଡିତ ଥିଲେ l ହେ ବିଦାୟ ମହାରଥୀ ଆଜି ଏ ଦିନ ଆମ ଜୀବନରେ ଅଭୁଲା ଦିନ l ହେ ବିଦାୟ ଆଚାର୍ଯ୍ୟ! ଆପଣଙ୍କ ସ୍ନେହ ଶ୍ରଦ୍ଧା କରୁଣା ଆମମାନଙ୍କ ପାଇଁ ବିଭୁକୃପା l ଯଦି ଆମେ କିଛି ଭୁଲ୍ କରିଥାଉ ତେବେ କ୍ଷମା ଦେବାକୁ ବିନମ୍ର ଅନୁରୋଧ l ମୋର ପ୍ରାଣପ୍ରିୟ ଶିକ୍ଷକଙ୍କ ପାଦପଦ୍ମରେ ନମ୍ର ପ୍ରଣିପାତ ଜଣାଉଛି l ଆଖିର ଲୁହ ମନର କୋହକୁ ସଦଗୁରୁଙ୍କ ପାଦପଦ୍ମରେ ଅର୍ପଣ କରି ବକ୍ତବ୍ୟ ଶେଷ କରୁଛି l ମୁଁ ଆଜିର ଏହି ବିଦାୟକାଳୀନ ସଭାରେ ତାଙ୍କ ଉଦ୍ଦେଶ୍ୟରେ ଛୋଟିଆ କବିତାଟି ପଢ଼ି ମୋର ବକ୍ତବ୍ୟକୁ ବିରାମ ଦେଉଛି l
ଜୀବନତ ରଙ୍ଗ ମଞ୍ଚ
ଚାଲେ ନିତି ଏଠି ଅଭିନୟ
କର୍ମ ତାଙ୍କ ମନ ମୋହେ
କର୍ମ ଏକା ତାଙ୍କ ପରିଚୟ l
ଆଜି ସିଏ ସବୁ ଭୁଲି ଚାଲିଯିବେ
ଲାଗୁଛି ଅଥୟ
ଆଖି ଆଜି ଓଦା ଓଦା
ହେ ପ୍ରିୟ ବିରହ ବିଦାୟ l

ଧନ୍ୟବାଦ

Farewell Speech in Odia for Teacher

Farewell Speech in Odia for Teacher, Farewell Speech in Odia for Teacher