Farewell Speech for Teacher in Odia

Farewell Speech for Teacher in Odia : It has been my great privilege and pleasure to work with you over the past few years. You have shown unfailing dedication to your students, and I often find myself marveling at the lengths you go to in order to help them develop into successful citizens. I know that you will continue to be an outstanding teacher, and I am grateful for your guidance throughout my career.

Farewell Speech for Teacher in Odia

ପ୍ରଧାନ ଶିକ୍ଷକଙ୍କୁ ବିଦାୟ ସମ୍ବର୍ଦ୍ଧନା

ମାନନୀୟ ସଭାପତି ମହୋଦୟ, ପୂଜ୍ୟ ଗୁରୁଜୀବୃନ୍ଦ , ଉପସ୍ଥିତ ଅତିଥିଗଣ ଓ ସ୍ନେହର ପ୍ରତିଯୋଗୀଗଣ ଏବଂ ଏଠାରେ ବସିଥିବା ମୋର ଛୋଟବଡ଼ ଭାଇଭଉଣୀମାନେ l ଆଜି ପବିତ୍ର ବିଦାୟ ସମ୍ବର୍ଦ୍ଧନାରେ କିଛି କହିବାର ସୁଯୋଗ ମିଳିଥିବାରୁ ମୁଁ ନିଜକୁ ଧନ୍ୟ ମନେ କରୁଛି l

ଆଜି ନିଶ୍ଚିତ ଭାବେ ଆମ ପାଇଁ ଏକ ଗୁରୁତ୍ବପୂର୍ଣ୍ଣ ଦିବସ l ଆମ ଗହଣରେ ରହି ଅଜ୍ଞାନର ଅନ୍ଧକାର ଦୂର କରି, ଜ୍ଞାନର ଆଲୋକ ଏହି ଅଞ୍ଚଳରେ ପ୍ରଦାନ କରିବାରେ ଯିଏ ସାରାଜୀବନ ସାଧନା କରିଥିଲେ, ସେ ଆମର ପରମ ପୂଜ୍ୟ, ବିଦ୍ୟାଳୟର ଖ୍ୟାତନାମା, ପ୍ରବୀଣ ଶିକ୍ଷାବିତ୍, ଛାତ୍ରବତ୍ସଳ ପରୋପକାରୀ ପ୍ରଧାନଶିକ୍ଷକ ———————— ମହୋଦୟ l

ବିଦାୟୀ ପ୍ରଧାନଶିକ୍ଷକଙ୍କ ନିକଟରେ କେବଳ ଏ ଅଞ୍ଚଳବାସୀ ନୁହେଁ ଆମ ଜିଲ୍ଲାବାସୀ ମଧ୍ୟ ରୁଣୀ ରହିଥିବେ l କାରଣ ଓଡ଼ିଶାର ଶିକ୍ଷାକ୍ଷେତ୍ରରେ ଆମର ପ୍ରିୟ ପ୍ରଧାନଶିକ୍ଷକଙ୍କ ସ୍ଥାନ ସ୍ଵତନ୍ତ୍ର l ତାଙ୍କ ଅବଦାନ ଅବିସ୍ମରଣୀୟ l ସେ ଚିର ନମସ୍ୟ, ବନ୍ଦନୀୟ l ତାଙ୍କର ଏହି ଅବସରକାଳୀନ ବିଦାୟ ସଭାରେ ଅଞ୍ଚଳବାସୀଙ୍କ ଆଖିରେ ଲୁହ, ମନରେ ଦୁଃଖ l ଏକଥା ସତ୍ୟ, ବିଦ୍ୟାଳୟ ଗୋଟିଏ ଜାହାଜ ହେଲେ ପ୍ରଧାନଶିକ୍ଷକ ତାର ଅଧିନାୟକ l ଛାତ୍ରଛାତ୍ରୀ, ସହକର୍ମୀ, ଅଭିଭାବକ, ସରକାରୀ କର୍ମଚାରୀଙ୍କୁ ସାମ୍ନା କରିବାର କୌଶଳ ପ୍ରଧାନଶିକ୍ଷକଙ୍କୁ ଜଣା l

ପୁରସ୍କାର ବିତରଣୀ ସଭା କୁହନ୍ତୁ, ଅଭିଭାବକ ସମ୍ମିଳନୀ କୁହନ୍ତୁ, ଉଚ୍ଚକୋଟୀର ଶିକ୍ଷାଦାତା କୁହନ୍ତୁ, ଦକ୍ଷ ଖେଲାଳି କୁହନ୍ତୁ ଏ ସମସ୍ତ ଗୁଣ ପ୍ରଧାନଶିକ୍ଷକ ନିକଟରେ ଏକତ୍ର ଦେଖାଯାଇ ନ ଥାଏ l ଆମ ପ୍ରଧାନଶିକ୍ଷକ ବିଦ୍ୟାଳୟର ଉନ୍ନତି ନିମିତ୍ତ ଅନେକ ଉପାୟ ଅବଲମ୍ବନ କରିବା ସହିତ ସେ ନିଜର ଅଦମ୍ୟ ନିଷ୍ଠା, ସାଧନା, ଉଦ୍ୟମ ବଳରେ ଏହି ବିଦ୍ୟାଳୟକୁ ଆଗେଇ ନେଇଛନ୍ତି l ଏହି ଅଞ୍ଚଳରେ ନିରକ୍ଷରତା ହାର ସର୍ବାଧିକ ଥିବାବେଳେ, ତାଙ୍କ ପ୍ରଚେଷ୍ଟାରେ ଏହି ଅଞ୍ଚଳ ଶିକ୍ଷାର ଆବଶ୍ୟକତା ବୁଝିସାରିଛି l

ଜଣେ ବିଚକ୍ଷଣ ବ୍ୟକ୍ତିତ୍ଵ ହିସାବରେ ସେ ଅନ୍ୟାନ୍ୟ ସହକାରୀ ଶିକ୍ଷକ, କର୍ମଚାରୀ, ଛାତ୍ରଛାତ୍ରୀ, ଅଭିଭାବକ, ସରକାରୀ ଅଫିସର କର୍ମଚାରୀଙ୍କୁ ସନ୍ତୁଷ୍ଟ କରିପାରିଛନ୍ତି l ମୁଁ ଜୋର ଦେଇ କହିପାରେ ଆମର ପ୍ରିୟ ପ୍ରଧାନଶିକ୍ଷକ ————————- ଶିକ୍ଷାଦାନ ସହିତ ବିଦ୍ୟାଳୟର ସମସ୍ତ କାର୍ଯ୍ୟକ୍ରମ ଯଥା କ୍ରୀଡା, ତର୍କ ପ୍ରତିଯୋଗିତା, ବଣଭୋଜି, ପରୀକ୍ଷା ପରିଚାଳନାରେ ଆଗ ଧାଡ଼ିର ବ୍ୟକ୍ତି ଥିଲେ l ତାଙ୍କ ବ୍ୟକ୍ତିତ୍ଵ ନିକଟରେ ଆଜି ଆମ ସମସ୍ତଙ୍କର ମୁଣ୍ଡ ନଇଁ ଯାଇଛି l ସେ ଜଣେ ଛାତ୍ରବତ୍ସଳ ପ୍ରଧାନଶିକ୍ଷକ l
ଛାତ୍ରମାନେ ବିଭିନ୍ନ ପରିବାର, ବିଭିନ୍ନ ପରିବେଶରୁ ଆସିଥାନ୍ତି l

ସେମାନଙ୍କ ମନସ୍ତାତ୍ତ୍ୱିକ, ଆର୍ଥିକ, ବୌଦ୍ଧିକ ବିକାଶ ଲାଗି ପ୍ରଧାନଶିକ୍ଷକ ସର୍ବଦା ସତତ ଚେଷ୍ଟା କରିଥାନ୍ତି l ଅଧାରୁ ବିଦ୍ୟାଳୟ ଛାଡ଼ି ଘରେ ରହିଥିବା ପିଲାମାନଙ୍କୁ ସେ ଘରକୁ ଯାଇ ତାଙ୍କ ଅଭିଭାବକଙ୍କୁ ବୁଝେଇ ତାଙ୍କୁ ପୁନର୍ବାର ବିଦ୍ୟାଳୟରେ ଯୋଗଦେବାର ପରିସର ସୃଷ୍ଟି କରିଛନ୍ତି l ଠିକ୍ ସମୟରେ ଆସିବା, ଠିକ୍ ସମୟରେ ଯିବା, ବିଦ୍ୟାଳୟ ପତ୍ରିକା ସମ୍ପାଦନ କରିବା, କ୍ରୀଡା କସରତ କରାଇବା ଆମ ପ୍ରିୟ ପ୍ରଧାନ ଗୁରୁଜୀଙ୍କର ପ୍ରଧାନ କାର୍ଯ୍ୟ ଥିଲା l ସେ ନିଜେ ପରିବାର ଠାରୁ ବହୁ ଦୂରରେ ରହି ବିଦ୍ୟାଳୟର ସର୍ବାଙ୍ଗୀନ ଉନ୍ନତି ପାଇଁ ସମୟ ଦେଇଛନ୍ତି l

ଦୀର୍ଘ———- ବର୍ଷ ଶିକ୍ଷକତା କରି ବୟସ ବୋଝରେ ଭାରାକ୍ରାନ୍ତ ହୋଇ ସୁଦ୍ଧା ମହାଶୟ ଦିନେ ହେଲେ ଶିକ୍ଷା ପ୍ରଦାନରେ ଅନିଚ୍ଛା ପ୍ରକାଶ କରିନାହାନ୍ତି ବା ଅବହେଳା କରିନାହାନ୍ତି l କେବଳ ସେତିକି ନୁହେଁ ନାଟକ ରଚନା କରିବା, ନିର୍ଦ୍ଦେଶନା ଦେବା, ନିଜେ ବଳିଷ୍ଠ ଭୂମିକାରେ ଅବତୀର୍ଣ୍ଣ ହେବା ଆମ ପ୍ରଧାନଶିକ୍ଷକଙ୍କର ଅନ୍ୟ ଏକ ଦୈବୀଗୁଣ l ଆଜି ଜାତୀୟ ସ୍ତରରେ ଏହି ବିଦ୍ୟାଳୟର ଛାତ୍ରଛାତ୍ରୀମାନେ ବେଶ୍ ସୁନାମ ଅର୍ଜନ କରିଛନ୍ତି l ନାନା ଔଷଧୀୟ ବୃକ୍ଷ ସହ ବିଭିନ୍ନ ଫୁଲର ସମ୍ଭାରରେ ବିଦ୍ୟାଳୟର ଉଦ୍ୟାନ ରମଣୀୟ l

ଛାତ୍ରଛାତ୍ରୀଙ୍କୁ ପୁଅ ଝିଅ ପରି ଭଲ ପାଇବା, ଦୋଷ ଦେଖିଲେ ଦଣ୍ଡଦେବା ତଥା କ୍ଷମା ପ୍ରଦାନ କରିବା ଆମ ପ୍ରଧାନଶିକ୍ଷକ ଙ୍କ ଅନନ୍ୟ ଗୁଣ l ସେ ଆମ ପାଇଁ ଯାହା କରିଛନ୍ତି ତାହାକୁ କେହି ବି ମୂଲ୍ୟାୟନ କରି ପାରିବେ ନାହିଁ l

ଆଜି ପ୍ରିୟ ପୂଜ୍ୟ ପ୍ରଧାନଶିକ୍ଷକ ଙ୍କ ବିଦାୟ ଲଗ୍ନ l ଏହି ଲଗ୍ନରେ ମୁଁ ମୋର ପିତୃପ୍ରତିମ ପ୍ରଧାନଶିକ୍ଷକ ପାଦପଦ୍ମ ରେ ନମ୍ର ପ୍ରଣିପାତ ଜଣାଉଛି l ଜ୍ଞାତ ବା ଅଜ୍ଞାତରେ କାୟମନବାକ୍ୟରେ ଯଦି ତାଙ୍କ ନିକଟରେ କିଛି ତ୍ରୁଟି କରିଥାଏ; କ୍ଷମାର ସାଗର ମୋତେ କ୍ଷମା ଦେବେ ବୋଲି ଅନୁରୋଧ କରୁଛି l ତତ୍ ସହିତ ବିଶ୍ଵ ନିୟନ୍ତାଙ୍କୁ ପ୍ରାର୍ଥନା କରୁଛି l ଆମ ସାରଙ୍କୁ ସୁସ୍ଥ ରଖନ୍ତୁ l ନୀରୋଗ ରଖନ୍ତୁ l

ଜଣେ କର୍ମଯୋଗୀ ଛାତ୍ରବତ୍ସଳ , ପ୍ରଧାନଶିକ୍ଷକ ଭାବେ ଆମ ସାର ରାଜ୍ୟ ତଥା କେନ୍ଦ୍ର ସରକାରଙ୍କ ଠାରୁ ବହୁବାର ପୁରସ୍କୃତ ହୋଇଛନ୍ତି l କିନ୍ତୁ ସବୁ ପୁରସ୍କାର ଠାରୁ ଶ୍ରେଷ୍ଠ ପୁରସ୍କାର ଛାତ୍ର ସ୍ନେହ l ହେ ଦୟାମୟ l ମୁଁ ମୋର ତନ ମନ ପ୍ରାଣ ଆପଣଙ୍କ ପାଦପଦ୍ମରେ ଅର୍ପଣ କରି ଶୁଭାଶିଷ ଭିକ୍ଷା କରୁଛି l ତତ୍ ସହିତ ଆପଣଙ୍କ ସାମ୍ନାରେ ବସିଥିବା ଛାତ୍ରଛାତ୍ରୀମାନଙ୍କୁ ଶୁଭ ଆଶୀର୍ବାଦ ପ୍ରଦାନ ଲାଗି ଆପଣଙ୍କ ପାଦପଦ୍ମରେ ଅଲି କରୁଛି l

ଆଜି ଦିନର ଏ ବିଦାୟ ଦୃଶ୍ୟ ମୋ ଜୀବନରେ ଅଭୁଲା ଦୃଶ୍ୟ ହୋଇ ରହିଯିବ l ଭଗବାନଙ୍କ ନିକଟରେ ତାଙ୍କର ସୁସ୍ଥ, ନିରାମୟ, ଦୀର୍ଘାୟୁ ଜୀବନ କାମନା ସହ ମୁଁ ମୋର ବକ୍ତବ୍ୟ ଶେଷ କରୁଛି l